اعترافات السارق العجوز
اعترافات السارق العجوز
بقلم:ولاء صبري الدسوقي
الحياة سبق…وأنا مش عايز العيال يتوهوا زي ما تهت..أنا لفيت كتير ولا حد سأل فيا… ..الدنيا زحمة…لو وقعتي…صدقيني محدش هيسندك…
كل ما هتيجي ترفعي رأسك…هتلاقي اللي بيدوسك
مفيش حاجه اسمها إنسانية…أنا ما قابلتهاش…متصدقيش أي حاجة عن الإنسان غير إنه مخلوق غدار…
يبات حبيب…يصبح عدو…ويرمي اللوم عالشيطان…بس الشيطان جنبه ملاك
والفلوس…
الفلوس هي كل حاجة…اللي يقولك غير كده يبقى بيضحك عليك…
من غير الفلوس متعرفيش تمشي خطوة واحدة…
بالك…كلامك الحلو اللي قلتي بتكتبيه ده.. عال أوي
لحد معاه فلوس…مش جعان…
الجعان هيقرأ إزاي…هو فيه وقت يسمع ..ده بيكمل عشاه نوم
الفضيلة والشرف… كلام حلو أوي يا أبلة…بس مينفعوش للناس اللي زي حالاتنا..مش هيعشوا العيال
ولا هيجيبوا تمن الدوا
أني مرحتش مدارس…الحياة مدتنيش وقت أتعلم…بس علمتني…أخطف اللقمة بسرعة.. عشان لو اتأخرت دقيقة واحدة مش هلاقيها
مش هقولك إني بريء ولا مظلوم…يمكن كنت مظلوم في الأول… بعد كده بقيت أنا الظالم ..
لكن أنا اتعودت أجري حافي…حتى لو عندي مية جزمة
اتعودت أمد إيدي في جيب غيري ..حتى لو جيبي عمران
يمكن مكونش جعان..لكن إحساس الخوف من الجوع… دائماً بيطاردني…
إحساس إني مهما صرخت..مش هلاقي اللي يغتني…
أنا حاولت ممدش إيدي…
ما القشية بقت معدن
بس افتكرت صورة العيل الصغير…اللي فضل يلف حافي وعريان في الشتا…مش لاقي مكان يروحه…
إحساس إن لو بطلت الشغلانة ديه…هرجع ألف كعب داير تاني…بردان وجعان
وجايز أكون عايز أنتقم من الأيام السودا اللي عشتها
جايز…
وجايز ربنا يتوب عليا…
اعترافات السارق العجوز
