اقـرأ
اقـرأ …
بقلم: شرف الفراني
اقرأ .. كما أمر الكتاب
مخلوقه لَك دنيا كما شَاءِ الإله
مفروض تكون جنة عَدَن
ارفع شعارَك يابن آدم ف الحياه ..
حُب وميزان عقل وقَلَم
إنتَ اللي حطيت جوَا جوفَك دنيا من فِعل الشيطان ..
………….. مليانه دَم
منقوش علي جدران مصير الكون … أَلَـم
“موروث” مع سيرة الغراب
سابح في بحر التيه عذاب
ومالكش ف الإحسان قَدَم
الناس خلاص رافعه النفير المُر من قهر الوجود نحو العَدَم
والكون علي خط النهايه فوق بناية الضلمه بيستسلم لفلسفة الهَـدَم
عالَم لا يُمكن يبقي له في النور رساله غير إن :
.. إبليس يتخَدَم
مالنَاش نصيب نبقي بشر ..
…………. بقلوب حجر
لِسانا بنعِد الحنين ،
ونشِد من روحنا الأنين
عايشين ف عصر الجاهليه
إتشَبَّعِت بالحِقد جوارحنا ..
وغشَّانا النَـدَم
بنجُر في ذيولنا السنين
والفتنه مدَّت بالجذور واتفرَّعت
عبر العصور من ” إرَم “
يا أمة الشِعر البديع
فجر التاريخ بيدوس علي رقاب الخَـدَم
زي الطوفان نشبه عبيد “اسبرطه” ف طباعنا النهَـم
هي الملاحم ف انتصارات الزمن ؟!
ولَّا الهزايم والمحن
عجز اِللي خطط للبطوله
ولا اعتلاها / ولا حَسَـم
ضحينا بالعلم وسجنا العقل للخرافه
وبقينا حُرَّاس للجهاله
خُدَّام للعَجَم .
