قال إيه الزمن جاي يداوي جرح قديم
قال إيه الزمن جاي يداوي جرح قديم
قلت له تقدر تداوي غدر حبيب
أو تجيب لي إيد ما تروحش من إيدي بعيد
أو هات لي إيد تمسح قسوة التنهيد
أو هات لي عافية تقدر
ع المعافرة وصحة حديد
تقدر تعيد لي من الغربة عمري وصباي
قلت له..
هات لي إيد تمسح الهم والتجاعيد
هات لي عيون خاليه م المداميع
جواها من الفرح ألف رصيد
ولا شافت سهر ولا تسهيد
هات لي عين لسه بريئة
ما تعرف للدمع طريق
محتاجه إيد تطبطب
ع القلب الحزين تداوي
جرح وألم من سهم عزيز
هات لي قلب ع الحب
يقدر تاني من جديد
عاوزه فرحة تملا
حياتي بدون مواعيد
رجع لي يوم كان فيه
قلبي بيغني سعيد
رجع لي دار كانت
مجمعه القريب والغريب
عِزوة وهيصة ولمه واخوات
شايلِنّي ف سواد العين
في عزهم شمسي
بتشرق ما بتغيب
هات لي ضحكة خارجة
من القلب في ليلة عيد
يوم ما أخدش مني التراب
غالي ولا حبيب
عاوزه قلب لا شاف
كسر ولا جرح أليم
عاوزه حبيب ما يخُنش
ما يسبش قلبي وحيد
حبيب يغطيني برمش عنيه
عاوزه بال خالي لا يعرف
فِكر ولا عقل سكنه التيه
أقول لك رجعني طفلة بريئة
فرحانه بالعديه ولبس العيد
نهى عراقي
