التشريفة

التشريفة
بقلم :ولاء صبري الدسوقي

والله يا عبسميع يا أخويا…الدنيا ديه ليها أحوال ..ولا دايم إلا وجه الله
عدى عليا يوم…كإنه حول

بأوله…الناس لبسوني البدلة..وعملوا التشريفة اللي هي..وأهلا يا سعادة البيه..

واتفضل هنا…لا والنبي هنا…لا تلاتة بالله العظيم..ما يقعد غير في اليمة ديه

…قال إيه…أني ورثت
وٱخر اليوم…لقتني مرمي..قدام وابور الطحين… من غير سلام ولا كلام…أصله كان تشابه أسماء

هييه…دنيا…
في لحظة تطلعك سابع سما…ولحظة تنزلك سابع أرض
وأني العبد لله…الغلبان…
بالهدمة أو من غير…

الأصل ما بيتغيرش…نفسي أعرف..الناس بتجيب الوشوش ديه منين…
جايز بيشتروها…وإكمني غلبان..معنديش غير وش واحد…

يا محلا الفقر يا ولاد… أول مرة أحمد ربنا إني ممعيش فلوس
كان زماني مش عارفني…

إياك تصدقها يا ولا…ديه دنيا كدابة…
ضحكتها صفرا…وسلامها…زور مش صدق

إياك تاخدها بجد…ولو لطمتك مية كف…

محدش فاهم فيها حاجة…هي هتاخد ..ولا هتدي
إحنا اللي غناي مش هما…

هي هتاخد مننا إيه…ولا حيلتنا إيه يا حسرة نبكي عليه
إحنا جينا الدنيا سياحة…قاعدين عالباب…شوية…وراحة

لكن دولا فقرا صحيح
يقضوا العمر بكا ونواح…عاللي يروح
والباقي يستنظروا تدي…

وتيجي تدي..تاخد أكتر…ويضيع العمر ..
بكا ونواح…وكذب وزور .. وفرح باهت …من غير لون

أما إحنا طلعنا حمير بصحيح..ديه الحسبة طلعت خسرانة…والزفة طلعت كدابة

وإحنا كنا نتحسر…على دنيا فانية…تراب في تراب..
ناولني الشاي يا عبسميع..ولا تحب أقولك ..يا سعادة البيه؟!

التشريفة